The Pixar Story (2007) [--01--]

“ஓவர் நைட்ல பெரிய ஆள் ஆய்ட்டான்யா” - என்பது ஒரு ‘உலகப் பொதுவுடமை’ டயலாக்! ஒவ்வொரு சாதனையாளர்களையும், அவர்களின் வெற்றியை பழிக்க, நாம் எடுக்கும் ஆயுதம்!

குழந்தைகளின் மாய உலகத்திற்கு, மூன்றாவது பரிமாணம் கொடுத்த பிக்ஸாரும் இதிலிருந்து தப்பவில்லை, இன்று வரையிலும்! ‘ஓவர் நைட் வெற்றி’யாகவே கருதப் படும், பிக்ஸாரின் பிண்ணனி என்ன, அவர்கள் அந்த ‘ஓவர் நைட்’டிற்கு கொடுத்த விலை என்ன, அந்த ‘ஓவர் நைட்’ சுமார் எத்தனை வருடங்கள் எடுத்துக் கொண்டது போன்ற கேள்விகளுக்கு விடை தெரிய வேண்டுமா? Leslie Iwerks இயக்கிய இந்த டாகுமெண்ட்ரியை ஒரு முறை பார்க்கவும் அல்லது தொடர்ந்து படிக்கலாம்!

---

ஜார்ஜ் லூகஸ்! இண்டியானா ஜோன்ஸ் படங்களின் தயாரிப்பாளர்; ஸ்டார் வார்ஸ் படங்களின் தயாரிப்பாளர்/இயக்குனர்; ஸ்பீகல்பர்கின் நெருங்கிய நண்பர். சிஜிஐ தொழில்நுட்பத்தை, சினிமாவில் உபயோகிப்பதன் அத்தனை கூறுகளையும் உணர்ந்து, தனது Industrial Light & Magic நிறுவனத்தின் மூலம், முழுவீச்சில் பயன்படுத்த ஆரம்பித்தார். இந்த பெரிய கம்பெனியின் ஒரு பகுதியாக, 1979-ல் இவர் ஆரம்பித்த நிறுவனம் Graphics Group.

இதற்கு கொஞ்சம் வருடங்கள் முன்பு, Dr. Edwin Catmull, தனக்கு அனிமேஷன் சரியாக வரவில்லை என்பதால், இயற்பியல் படிக்கப் போய், இயற்பியல் சூத்திரங்களை அனிமேசனில் பயன்படுத்த ஆரம்பித்தார். முதன் முதலில் (1973) தனது இடது கையை அனிமேட் செய்து காட்ட, அது 1976-ல் சினிமாவின் (Futureworld) முதல் 3-டி அனிமேடட் காட்சியாக வெளிவந்தது. Graphics Group-ன் தலைவராக இவர், தன் பணியை ஆரம்பிக்க, இதில் அடுத்த பெரிய தலை ஒன்று வந்து சேர்ந்தது.

John Lasseter: அனிமேஷன் என ஒன்று இருக்கும் வரை யாரும் மறக்க முடியாத பெயர். டிஸ்னி ஆரம்பித்த அனிமேஷன் (2-டி அனிமேஷன்) ஸ்கூலின் இரண்டாவது மாணவராக சேர்ந்து, அங்கேயே வேலை பார்த்து, ஒரு கட்டத்தில் டிஸ்னியால் கழற்றி விடப் பட்டவர். ஒரு அனிமேஷன் கன்வென்ஷனில் இவரை பார்த்த எட்வின், அந்த இடத்திலேயே அப்பாய்ண்ட்மெண்ட் ஆர்டரை கொடுக்க..., க்ராஃபிக்ஸ் க்ரூப் களை கட்டியது.  1984-ல் The Adventures of André and Wally B - என்ற குறும்படத்தை (Pixar's Short Film Collection-ல் இந்த படமும் உண்டு), ஜான் அனிமேஷன் செய்ய, அன்றைய கட்டத்தின் ‘அனிமேஷன் புரட்சி’யாக, இந்த படம் கருதப்பட்டது.

எட்வினுக்கும், ஜானுக்கும், கம்ப்யூட்டர் க்ராஃபிக்ஸிலேயே ஒரு படம் எடுக்க வேண்டும் என்ற ஆசையிருந்தாலும், லூகஸுக்கு அப்பொழுது பணப் பிரச்சனை. அவரின் ஸ்டார் வார்ஸ் ஃப்ரான்ச்சைஸிலிருந்து வரும் பணம் குறைந்து விட்டதாலும், அவர் தயாரித்த Howard the Duck என்ற படம், பணத்திற்கு பதில் வெறும் ‘முட்டை’ போட்டதாலும் இக்கட்டில் மாட்டிக் கொண்டார்.

அதை விட பெரிய பிரச்சனை (1984) அவருக்கு ஒன்று இருந்தது. அது இந்த ஊரில், பில்கேட்சையே போண்டியாக்கும் விசயம். **டைவர்ஸ்**!! மனசாட்சி என்பதே என்னவென்று தெரியாத திருடன் கூட போனால் போகிறது என வீட்டில் கொஞ்சம் விட்டுவிட்டுப் போவான். லூகஸ் கோட்-சூட்டோடு திறிவதே பெரிய ஆச்சரியம்தான்!

க்ராஃபிக்ஸ் க்ரூப்பில் அதி முக்கியமான ஆள் சேர்ந்தது இந்த சமயத்தில்தான். R&D-க்கே செலவு கட்டுப்படியாகததால், வந்த விலைக்கு கம்பெனியை தள்ளிவிட ரெடியாக இருந்த லூகஸின் கண்ணில், தான் உருவாக்கிய கம்பெனியில் இருந்தே.. நாகரிமாக வெளியே தள்ளிவிடப் பட்ட ஒருத்தர் தென்பட்டார்.

அது ஆப்பிள் நிறுவனத்தின் முன்னாள் மற்றும் இன்னாள் தலைவர், உலகின் மிகச் சிறந்த பிஸினஸ் மேன்-களில் ஒருவர், எலக்ட்ரானிக் இளைஞர்களின் ஆதர்ஷ நாயகன் ஸ்டீவ் ஜாப்ஸ். ஆப்பிள் நிறுவனத்திலிருந்து 1985-ல் வெளியேறிய ஜாப்ஸ், 1986-ல் $5 மில்லியன் டாலரை கொடுத்து Graphics Group நிறுவனத்தை வாங்கினார். உடனே.. கம்பெனியில் பாலும் தேனும் பெருக்கெடுத்தா?

அப்பொழுது க்ராஃபிக்ஸ் க்ரூப், பிக்ஸார் என்ற ப்ரேண்டில் கம்ப்யூட்டரை அஸம்பிள் செய்து, பெரிய பெரிய கம்பெனிகளுக்கு விற்றுக் கொண்டிருந்தது.  அதில் டிஸ்னியும் ஒன்று. கூடவே... விளம்பரங்களுக்கான அனிமேஷனும்.  ஜாப்ஸ், க்ராஃபிக்ஸ் க்ரூப்பை, பிக்ஸார் என்று பெயர் மாற்றி, அதே தொழிலை செய்து கொண்டிருந்தார்.

ஜான், எட்வின், ஜாப்ஸ் என எல்லோருக்கும், அனிமேஷன் படம் என்ற கனவு மட்டும் அருமையாக இருந்தது. காசுதான் இல்லை.  1986-ல் கம்பெனியை வாங்கியப் பின், எதுவும் போணியாகததால், ஸ்டீவ் ஜாப்ஸ்... முறையே ஈ.. எறும்பு, கொசு மற்றும் தேனீ என எல்லாவற்றையும் ஓட்டிக் கொண்டிருக்க, ஒரு கட்டத்தில் ஓட்டுவதற்கு கடையில் எதுவும் இல்லாமல், வேலையிலிருந்த முக்கால்வாசி பேரை வீட்டுக்கு ஓட்டி விட்டார்.

பிக்ஸார், இனி அதோ கதிதான் என எல்லோரும் நினைத்த பொழுதுதான், இவர்களிடம் கம்ப்யூட்டர் வாங்கி, அதை தன் 2-டி அனிமேஷன் படங்களுக்கு உபயோகித்துக் கொண்டிருந்த டிஸ்னி..., பிக்ஸாருடன் ஒரு ஒப்பந்தம் போட்டது. அது பிக்ஸாரின் வாழ்க்கையையும், ஹாலிவுட்டின் அல்லது உலகப் படங்களின் “அனிமேட்டட் கார்ட்டூன்” என்ற பிரிவின் தலையெழுத்தையும்,  தலை கீழாக்கியது.

மீதி... நாளைக்கு!

---

நேத்து Couples Retreat போக முடியலை.  இன்னைக்கு நிச்சயம் நீங்கள் எதிர்பார்க்கலாம்.

---