The Pixar Story (2007) [--18--] - முற்றும்

இந்தப் பகுதி..., பிக்ஸாரின் இணையப் பக்கதில் இருந்து எடுத்தது. அதன் ஆங்கில வடிவத்தை தமிழில் தர முயற்சிக்கிறேன். இவை அனைத்தும் பிக்ஸாருக்கே சொந்தம். தவறை திருத்துமாறு, சைலண்டாக படித்து (மனதுக்குள் சிரித்து)க் கொண்டிருக்கும், அனிமேஷன் துறை நண்பர்களை வேண்டிக் கொள்கிறேன்.

---

பிக்ஸாரின் சினிமாக்கள் மொத்தம் நான்கு நிலைகளில் உருவாக்கப் படுகிறது.

1. டெவலப்மெண்ட்: கதையின் ஒன் லைனரோ, ஒன் பாராவோ முடிவு செய்யப் படுவது.
2. ப்ரீ-ப்ரொடக்‌ஷன்: தொழில்நுட்ப ரீதியாக வரப்போகும் சவால்களை கணிப்பது
3. ப்ரொடக்‌ஷன்: படத் தயாரிப்பு
4. போஸ்ட்-ப்ரொடக்‌ஷன்: இதைப் பத்தி சொல்லனுமா என்ன?

இந்த நான்கு நிலைகளை, பதினான்காக பிரித்திருக்கிறார்கள்.

01. கதைக் கரு: சார்.. உங்களுக்குன்னே.. ஒரு ஆக்‌ஷன் கதை இருக்கு. ஒன்லைன் மட்டும்தான் ரெடியா இருக்கு-ன்னு கோடம்பாக்கத்தின் தேசியகீதம்-தான் இது. பிக்ஸாரின் ஊழியர்கள் யாருக்காவது தோன்றும் ஐடியாவை, கொஞ்சம் படங்களாக வரைந்து கொண்டு விவாதிக்க ஆரம்பிப்பது.

02. ட்ரீட்மெண்ட்: இதுவும் கோடம்பாக்கம் வார்த்தைதான். கதை தேர்ந்தெடுக்கப் பட்டவுடன், ஒரு ஐடியாவை... ஒன்பது விதங்களில் பார்ப்பது (இவரின் கதைக்கு, மணிரத்னத்தின் ட்ரீட்மெண்ட் என சொல்வோமே).

03. ஸ்டோரி போர்ட்: சத்தியமாய் கோடம்பாக்க வார்த்தை இல்லை. செட்டுக்கு வந்தப் பின்தான் காட்சி/வசனங்களைப் பற்றியே நம்மவர்களில் 90% யோசிப்பார்கள். ஆங்கிலப் படங்கள் அத்தனையும், முதலில்.. காட்சிகளை வரைந்து, அவர்களே அதை நடித்தும் பார்த்துவிட்டு தான் மற்ற ஏரியாவுக்கு செல்வார்கள் (75,000 - 125,000 வரை படங்கள்-ன்னு ஏற்கனவே பார்த்திருக்கோம்).

04. டப்பிங்: இது அனிமேஷனுக்கு மோசமான வார்த்தை. வாய்ஸ் டேலண்ட் என்றுதான் சொல்கிறார்கள். நான்(ம்) நினைப்பது போல, முதலில்.. படத்தை எடுத்துவிட்டு, அப்புறம்.. குரல் கொடுக்கும் ரெகுலர் படங்கள் போல் அல்ல.

முதலில்..., பிக்ஸார் ஊழியர்களே குரல் கொடுத்து.. ஸ்டோரி போர்டின் முழுப் படத்தையும் ஓட்டிப் பார்ப்பார்கள். பின் வசனங்கள் எழுதப்படும். அந்த வசனங்களை, பலப் பல விதங்களில் எல்லா நடிகர்களும், பேசிவிட்டு சென்றுவிட, அதன் பிறகுதான்.. நடிகர்கள் பேசியதிலேயே சிறந்த மாடுலேஷனை தேர்ந்தெடுத்தப் பின், அனிமேஷனெல்லாம் ஆரம்பிக்கும். அவர்களின்.. வாய்ஸுக்கு ஏற்றபடி!!!

05. ரீல்: இது ஸ்டோரி போர்டையும்-வாய்ஸையும் சேர்த்துப் பார்ப்பது. இதிலிருந்து தேவையில்லாத சீன்கள்-வசனங்கள் எல்லாவற்றையும் நீக்கிவிட்டு, ஒவ்வொரு காட்சியின் தொடர்ச்சியையும், காட்சி நீளத்தையும் கணக்கிடப் பயன்படுத்துகிறார்கள்.

06. லுக் & ஃபீல்: கேரக்டர்களை CG-யாக உருவாக்குவது இந்த ஸ்டேஜில் தான். முழுக்க முழுக்க ஆர்ட் டைரக்‌ஷனின் வேலைகள். காட்சிப் படுத்துதல், அந்த காட்சிக்குத் தேவையான பொருட்கள், கற்பனைக் கேரக்டர்களுக்கு வடிவம் கொடுத்தல், அவற்றிற்கான நிறங்கள்.. இதெல்லாம். எல்லாம் 2டியில் மட்டுமே!

07. மாடல்கள்: லுக் & ஃபீல் கிடைத்தவுடன், அவற்றை இரண்டு விதங்களில் கணிப்பொறி டேட்டாவாக மாற்றுதல்.

    7.1  நம் தஞ்சாவூர் பொம்மைகளாக, உயர-அகல-கணங்களை கொண்டு செய்து கொள்வது. ஏற்கனவே முடிவெடுத்த நிறங்களை அவற்றிற்கு பூசுவது, வெயில் காய வைப்பது... etc.. etc...! பின் அதன் முப்பரிமாணங்களையும், ஸ்கேன் செய்து கணிப்பொறிக்குள் செலுத்துவது.

    7.2 நேரடியாகவே.. கணிப்பொறியில், 3டி கேரக்டர்களாக மாடல் செய்வது. இப்படி செய்தப் பின், மாடல்களின் ஒவ்வொரு உடல் பகுதியும் தனித்தனியாக பிரிக்கப் பட்டு Animation Variables (Avars) கொடுக்கப் படுகின்றன. இந்த Avars -ஐ வைத்துத்தான்... கண்ணை சிமிட்டுவதா, கையை ஆட்டுவதா.. என முடிவு செய்து கட்டளை கொடுக்கிறார்கள்.

(மோஷன் கேப்சரில் உருவாகும் படங்களும் இதே Animation Variables முறையைத் தான் உபயோகிக்கிறார்கள்.  சுல்த்தான் த வாரியரில் ல் தலைவர்.. பல்டி அடிக்கப் போவது, Avars- புண்ணியத்தில் தான்.)

08. செட் டெகொரேஷன்: ஆறாவது பாய்ண்டில், கிடைக்கும் ஐடியாவிலிருந்து, 3டி-க்கு மாறியப் பின், காட்சியில் தெரியும்.. ஒவ்வொன்றையும் அழகு படுத்துவது இவர்களின் வேலை. பெரும்பாலும் சுவற்றுக்கு பெய்ண்ட் அடிப்பது, கட்டில் மெத்தைக்கு உறை மாட்டுவது மாதிரியான ‘ஹவுஸ் கீப்பிங் வேலைகள்’ (இண்டோர் சீன்-னாய் இருந்தால்).

09. லே-அவுட்: வரையப் பட்ட, ஸ்டோரி போர்ட் ஓவியங்கள், முப்பரிமாணத்திற்கு மாறும் நிலை. வரைபடத்தில் தெரிவது போன்ற, முக பாவனைகள், கேரக்டர்கள் & பொருட்கள் இருக்கும் இடம் என எல்லாவற்றையும்.. ஒழுங்கு படுத்துவது. ஒரே காட்சி பலவிதங்களில் ஷூட் செய்யப் பட்டு, எடிட்டிங்கில் எது வேண்டுமோ அதை எடுத்துக் கொள்வது.

10. அனிமேஷன்: ஒரு அனிமேஷன் படத்தின் அனிமேஷனே, பதினாலில் பத்தாவது ஸ்டெப்தான். இந்த நிலையில் கேரக்டர்கள் நடிக்க ஆரம்பிப்பதற்கு (மூவ்மெண்ட்), தேவையான அத்தனைப் பொருட்களும்... அந்த செட்டில் இருக்கும் (ஆர்ட், லேஅவுட், Avars).

(தெரியாதவர்களுக்கு மட்டுமே இந்த பாரா) Adobe Flash அனிமேஷனில், கீ ஃப்ரேம் என்ற முறையில், முதல் செகண்டில் கையை கீழேயும், இரண்டு செகண்ட் கழித்து கையை மேலேயும் வைத்துவிட்டால்.. நடுவில் தேவைப்படும் இரண்டு செகண்டிற்கான அனிமேஷனை, Flash-ஏ எழுதிக் கொள்ளும் (ஒரு செகண்டுக்கு 24 ஃப்ரேம்கள் என்றால் இரண்டு செகண்டிற்கு 48 ஃப்ரேம்களில் 1 & 48 மட்டும் நாம் சொல்கிறோம். 2-47-ஐ சாஃப்ட்வேரே எழுதிக் கொள்ளும்).

அதே கீ ஃப்ரேம் அனிமேஷன் முறைதான், அனிமேஷன் படங்களிலும். தேவைப் படும் இடங்களில் மட்டும் மாற்றங்கள் செய்து கொள்வார்கள். (அனிமேட்டர்கள் அடிக்கடி சொல்வது “பெரும்பாலான வேலையை, கணிப்பொறியே செய்தாலும்..., பெயர் மட்டும் எங்களுக்குத்தான்”).

11. ஷேடிங்: Ray Tracing பதிவின் ஒருப் பகுதி. ஒரு பொருளின் நிழல் எங்கே விழுந்தால், என்னவாகும் என்பதை தீர்மானிப்பது. ரிஃப்லெக்‌ஷன்... ரிஃபராக்‌ஷன்.... சரி.. வுடுங்க..! ஏன் வீண் வம்பு!

12. லைட்டிங்: இங்கேதான் நம் பின்னூட்ட நண்பர், சந்தோஷ் வருகிறார். மறுபடியும் Ray Tracing கதைதான்.  ஆனால்.. அதன் இன்னொரு பகுதி. நிழலுக்கும் - எதிரொளி-க்கும் பார்த்த வித்தியாசங்கள், இங்கேதான் பிரிகின்றன (சந்தோஷின் இந்தப் பதிவில் அவருடைய லைட்டிங் டெமோவை இணைத்துள்ளார். இந்த ஏரியாக்களில் நம்மவர்களின் எண்ணிக்கையை விரல் விட்டுக் கூட எண்ணத் தேவையில்லை. இதுபோன்ற பதிவர்களை ஊக்குவித்தால்..., அவர்கள் வருங்காலத்தில் எழுதும் டெக்னிகல் பதிவுகளில் நாமெல்லாம்.. கொஞ்சம் தெரிந்து கொண்ட மாதிரியாவது இருக்கும். நம் ஆதரவை அவருக்குத் தெரிவிப்போமாக!) .

13. ரெண்டர்: கார்ஸ் படத்தில், ஒவ்வொரு ஃப்ரேமும் (ஒரு நொடிக்கு 24) ரெண்டரிங் ஆக 17 மணி நேரம் எடுத்தது எனப் பார்த்தோம். பிக்ஸார், இதை ஆறு மணி நேர ஆவ்ரேஜ்ஜாக (Ray tracing-ஐ முழு அளவில் பயன்படுத்தாத சீன்கள்) சொல்கிறது.  அதே நேரம்.. அதிக பட்சமாக 90 மணிநேரம் வரை ஒரு ஃப்ரேம் எடுக்குமாம்.

14. ஃபைனல் டச்: படத்தின் மிச்சப் பகுதிகளான, எடிட்டிங், பிண்ணனி இசை கோர்ப்பு, சவுண்ட் எஃபெக்ட், விஷுவல் எஃபெக்ட் அப்புறம்.. கடேடேடேசியாக... PC to Film/Digital Source.

---

---

அனிமேஷன் துறையே, இப்பொழுது கேரக்டர் அனிமேஷன், மற்றும் மோஷன் கேப்சர் அனிமேஷன் என இரண்டாக பிரிந்து விட்டது.  முதல் பிரிவில் Pixar, DreamWorks, Blue Sky Studios என மிக ஸ்ட்ராங்கான போட்டிகள் இருக்கும் போது, அடுத்தப் பிரிவில் Forrest Gump, Back to the Future படங்களின் இயக்குனர் Robert Zemeckis-ன் ImageMovers நிறுவனம் The Polar Express, Beowulf என 2007-ஆம் ஆண்டு வரை கலக்க...

அனிமேஷன் உலகின் ஜாம்பவான் டிஸ்னியோ... இது அது எனப் பார்க்காமல், போட்டியாளர்களை வளைத்து போட்டே காரியத்தை சாதிக்கப் பார்க்கிறது.

ஏற்கனவே பிக்ஸாரை வாங்கி, 3டி கேரக்டர் ஏரியாவை கை வைத்துக் கொண்ட டிஸ்னி, ImageMovers-ஐயும் விலைக்கு வாங்கி (2007), ImageMovers Digital என பெயர் மாற்றி, Motion Capture ஏரியாவிலும் ஒரு இடத்தை போட்டுக் கொண்டு விட்டது.

(எட்டாவது பதிவில் Robert Zemeckis-ஐ அறிமுகப் படுத்தினது இதனால்தான். இதைத் தான் 9-ஆவது பதிவில் சொல்ல வந்தேன். கொசுவர்த்தி + ஜவ்வு பிரச்சனை ஆரம்பிச்சிடனால அப்படியே டீல்ல விட்டுட்டேன்.)

ImageMovers -> ImageMovers Digital என மாற்றப் பட்ட பிறகு எடுக்கப் பட்ட முதல் motion capture படம் A Christmas Carol அடுத்த வாரம் ரிலீஸ்-ற்கு ரெடியாகி விட்டது.

இப்பொழுது, டிஸ்னியின் அடுத்தக் கட்டம்: ஜட்டியை உள்ளே போட்ட... பெரும்பாலான சூப்பர் ஹீரோக்களின்  உரிமையாளர் Marvel Comics நிறுவனத்தார் (Iron Man படத்தை எடுத்தவர்கள்). டிஸ்னி இதையும் இப்பொழுது Marvel நிறுவனத்தையும், கடந்த ஆகஸ்ட் மாதம் வாங்கிப் போட்டு விட்டது ($4 பில்லியன் டாலர்கள்).

---

அனிமேஷன் துறையில், பிக்ஸார் உள் நுழைந்து, காட்டிய மூன்றாவது பரிமாணத்தினால், காலம் காலமாக இருந்து வந்த 2டி அனிமேஷன், 99% அழிந்து விட்டது. கால ஓட்டத்தில் தங்களை இணைத்துக் கொள்ள முடியாத, 2டி-யையே நம்பியிருந்த பெரும்பாலான ஸ்டுடியோக்கள், 2000-ன் ஆரம்பத்திலேயே கடையை மூடிவிட்டன. 

ஆனானாப்பட்ட டிஸ்னியே, இனிமேல் 2டி படங்களை தயாரிக்கப் போவதில்லை என சொல்லி, அதன் 2டி பிரிவை, 2004-ல் மூடி விட்டது (அதன் கடைசி 2டி படம் Home on the Range). 

ஆனால், பரிகாரமாகவோ என்னவோ, ஜானும், எட்வினும் டிஸ்னியின் (அனிமேஷன்) தலைமைப் பொறுப்பை ஏற்ற பின், அந்த பிரிவை மீண்டும் திறந்து இருக்கின்றனர்.  இதிலிருந்து வெளிவரப் போகும் முதல் 2டி படம் The Princess and the Frog (டிசம்பர் 11, 2009).

ஏழு படங்கள், மனித வாடையே (அவ்வளவாக) இல்லாமல, படமெடுத்த பிக்ஸார் கூட... Ratatouille, Wall-E, படங்களில் மெதுவாக மனிதர்களை புகுத்த ஆரம்பித்து, Up-ல் முழுமையாக மனிதர்களுக்கு வந்து விட்டு... திரும்பவும் Toy Story 3 (2010), Cars 2 (2011) என பழைய ஏரியாவிற்கே போய்விட்டது.

இதில் The Princess and the Frog படத்தின் வெற்றி-தோல்வி, நிச்சயம் 2டி-யின் தலைவிதியை தீர்மானிக்கலாம். அப்படி வெற்றியடையும் பட்சத்தில், நாம் திரும்பவும் 2டி படங்களை ரசிக்கவோ, அல்லது 3டி கேரக்டர் படங்களை மறக்கவோ கூட செய்யலாம். அவ்வளவு ஏன், எதிர்காலத்தில் பிக்ஸாரே கூட, 2டி படத்தை எடுக்கலாம்.

யாரு கண்டா...? வாழ்க்கை ஒரு வட்டம்தானே!

---

---

!!முற்றும்!! !!முற்றும்!! !!முற்றும்!! !!முற்றும்!!

---

---

---

ஓஷோ-வையும், க்ளிஷே-வையும் படிப்பவர்களும், கிம்-கி-டுக்கையும்... டம்-கி-டுக்கையும் பார்ப்பவர்களும் தான் அறிவாளிகள் போலவும்........,

காமிக்ஸ் படிப்பவர்களும், அனிமேஷன் படங்கள் பார்ப்பவர்களும் என்னவோ குழந்தைத்தனமாகத் தான் இந்தியாவில் பார்க்கப் படுகிறார்கள்.

அப்படிப் பார்ப்பவர்களில்..., அவர்கள் பார்க்கும் படங்களை விட, நாற்பது வருட அட்வான்ஸ்ட் டெக்னாலஜியில், நான்கு மடங்கு அதிக உழைப்பில் உருவானவை.. அனிமேஷன் படங்களும்/காமிக் புத்தகங்களும் என... இதைப் படித்த யாராவது ஒருவர் உணர்ந்திருந்தால்.. கூடப் போதும். அதை இந்தத் தொடரின் வெற்றியாக எடுத்துக் கொள்கிறேன்.

---

ஊஉவ்வ்...! ரொம்ப டயர்டாகவும், ரிலீஃபாகவும் ஒரே சமயத்தில் உணர முடியுது! ரெண்டு வரி எழுத... 40 பக்கங்கள் எல்லாம் படிக்க வேண்டியிருந்தது. கட்டுரைகள், வீடியோ, இண்டர்வ்யூஸ், வரலாறு, இயற்பியல், வேதியியல் என நான் பேதியியல் ஆகக் கூடிய என்னென்னமோ படிச்சாச்சி.

கிடைத்த நேரத்தில், திரட்டிய தகவல்களை, முடிந்த வரை சரிபார்த்துத் தான் எழுதியிருக்கேன். ஆனால் 100% சரியான தகவலா எனத் தெரியாது. பிழைகளை சுட்டிக் காட்டினால்... திருத்திக் கொள்வேன்.

அப்படி படிச்ச அத்தனைத் தகவல்களையும்.. உங்க மேலயும் திணிக்க முயற்சி செய்து (ஒரு 25% கூட சொல்லலை) .. சில சமயம் ஜெயித்து, சில சமயம் தோற்று..., நிறைய படித்து, நிறைய (உங்களோடு) தெரிந்து கொண்டு, நிறைய (உங்களையும்) குழம்பி Its really.. really fun!!!!!!!!!

ஒரு பதிவு பிரபலம ஆகலைன்னாலும் தொடர் எழுதும் விருப்பம் கம்மியாகியிருக்கும். ஆனா.. அத்தனைப் பதிவுகளையும்...  எழுதிய கொஞ்ச நேரத்திலேயே பிரபலமாக்கிய தமிழிஷ் ஓட்டு நண்பர்களுக்கும், ஒன்னு ரெண்டு விழுந்தாலும் ஓட்டு ஓட்டு தானே... அதனால்.. தமிழ்மண வாக்காளர்களுக்கும்... இமெயிலில் வாழ்த்திய நண்பர்களுக்கும்,

தவறாமல் அத்தனைப் பதிவுகளிலும் பின்னூட்டிய, பப்பு, சென்ஷி, கோபி, விஜய், கிஷோர், வினோத், கனகு (வேற யாராவது விட்டுப் போச்சா?), இன்னும் பல புதிய பின்னூட்ட நண்பர்கள்..., அத்தனை பேருக்கும்....... “நீங்களில்லாமல் இந்தத் தொடர் இல்லை”!!!

முதல் பகுதி, கேபிளுக்குப் போய்விட்டதால்... , உங்கள் எல்லோருக்கும்...... இந்த இரண்டாம் பகுதி...

!!சமர்ப்பணம்!!

---

---

இனி என்னை புதிய உயிராக்கி
மதி தன்னை மிகத் தெளிவு செய்து
என்றும் சந்தோஷம் கொண்டிருக்கச் செய்வாய் - பிக்ஸார்
எங்களை என்றும் சந்தோஷம் கொண்டிருக்கச் செய்வாய்!!!

-பாரதி (மன்னிப்பாராக)

[PDF விஷயம் கூடிய விரைவில். கடவுளே.. யாரும் கேஸ் போடாம இருக்கனும்! :)  வேறு நண்பர்கள் இதை PDF-ஆக மாற்றினாலும், அதில் என் ப்ளாக் அட்ரஸை கொடுக்கவில்லை என்றாலும்... எனக்கு 100% சம்மதம்தான். I still feel I don't own anything at all!]

---