The Blind Side [Best of 2009 - 04]

கதையை படிச்சிட்டு, எதோ கண்ணைக் கசக்கற படம்னோ, அமெரிக்கன் ஃபுட்ஃபால் தெரியாம எப்படிப் படம் பார்க்கறதுன்னோ நினைச்சிடாதீங்க. இது 100% FEEL GOOD படம்.

“பெரும்பாலான நேரம், பந்தை கையில் வைத்துக் கொண்டேயிருக்கும் இந்த விளையாட்டை ஏன் ஃபுட்பால்-ன்னு கூப்பிடுறீங்க”-ன்னு, சுத்தியிருக்கும் அத்தனை அமெரிக்கரிடமும் கேட்டு சலிச்சாச்சி. யாருக்கும் பதில் தெரியலை. ஆனால் இவர்களிடம்... நம் ‘ஃபுட்பாலை’ப் பத்தி பேசினால்.. ‘ஹோ... சாக்கர்’ -ன்னு நம்மை திருத்துவாங்க.

கொஞ்ச நாளாகவே இந்த படத்தைப் பத்தி எழுதலாமா வேணாமான்னு தடுமாறி கிட்டு இருக்கேன். க்ரிக்கட்டைத் தவிர மற்ற விளையாட்டுக்களில் நமக்கு ஈடுபாடு இல்லாதது ஒரு காரணம். புது முயற்சிகளை நிறைய பேர் வரவேற்க ரெடியா இருக்கறனால.. இந்த படத்தைப் பத்தி எழுதலாம்னு முடிவு பண்ணிட்டேன். :)

அடுத்ததா எழுதப் போறப் படமும், விளையாட்டு சம்பந்தப் பட்டதுதான் (Invictus). இரண்டு படங்களின் விளையாட்டுக்களும் பார்க்க ஒரே மாதிரி இருந்தாலும் பெரிய வித்தியாசங்கள் உண்டு. The Blind Side - படம், பார்க்க ரக்பி போலவே இருக்கும், அமெரிக்கன் ஃபுட்பால் பற்றியது.

இந்த விளையாட்டில் Blind Side -ங்கறது, ஒவ்வொரு முறையும் பந்து நிறுத்தப் பட்டு, திரும்ப ஆட்டம் ஆரம்பிக்கும் போது, அந்த விளையாட்டின் வெகு முக்கியமான, Quarter Back எனப்படும் ப்ளேயருக்கு பந்து பாஸ் செய்யப் படும். அப்பொழுது இருந்து ஆட்டம் ஆரம்பம். அந்த Quarter Back கொஞ்சம் நிதானித்து, யாருக்கு பந்தை பாஸ் பண்ணலாம் என முடிவெடுத்து....,

.....பந்தை எறியும் போது, அவன் வலது கை பழக்கம் உள்ளவன் என்றால்... இடது பக்கமிருந்து யாராவது தாக்க வந்தால், அவனால் முழுமையாக பார்க்க முடியாது. அது Quarter Back-ன் Blind Side. அந்த ஏரியாவை கவர் செய்ய, ஆஜானுபாகு ஆட்கள் வேண்டும். ஏனெனில், Quarter Back-ஐ மோத வருவதும், அதே சைஸ் ஆட்களாகத்தான் இருக்கும்.

---

இது கொஞ்ச வருடங்களுக்கு முன் நடந்த உண்மைக் கதை. அப்பா யாரென்பது அம்மாவுக்கே குழப்பமான ஒரு கருப்பரின குடும்பத்தில், ஒரு டஜன் குழந்தைகளில் ஒருவனாகப் பிறந்து, அம்மாவின் போதை பழக்கத்தால்.., அரசாங்கம் அவளிடமிருந்து குழந்தைகளை பறித்துக் கொள்ள...

... இது போன்ற மைனர் குழந்தைகளை வளர்க்கும் foster care விடுதிகளில் மைக்கெல் வளருகிறான். ஆக்சுவலி... கொஞ்சம் ஓவராக வளர்ந்து விடுகிறான். பதினேழு வயதில், ஆறரை அடி உயரத்தில், 140 கிலோ.

படிப்பில் ஆர்வமில்லை. பரிட்ச்சைப் பேப்பர்களில், அவன் பெயரை எழுதினாலே பெரிய விஷயம். பாசம் காட்ட யாருமில்லாமல், மற்றவர்களுடன் பேசுவதே கிடையாது. ஏற்கனவே ஏகப்பட்ட foster care விடுதிகளில் இருந்து மாறி மாறி, இப்பொழுது டென்னஸஸி மாநிலத்தில் தஞ்சம். அத்தனை சப்ஜக்டிலும் ஃபெய்ல் என்றாலும், ஒரு சப்ஜெக்டில் மைக்கெலை அடிக்க யாருமில்லை.

Protective Instinct!! தனக்கோ, தன்னைச் சார்ந்தவர்களுக்கோ, எதாவது பாதுகாப்பு தேவை என்னும் பொழுது, மைக்கெலின் ரியாக்‌ஷன் மற்றவர்களை விட மிக மிக அதிகம்.

ஒரு குளிர் நாளில் படுக்க இடமில்லாமல் அலையும் அவனுக்கு, சாண்ட்ரா புல்லக்கின் குடும்பம் அவனுக்கு தங்க இடம் கொடுக்க, கொஞ்சம் கொஞ்சமாக... அந்த வீட்டின் இன்னொரு குழந்தையாக தத்தெடுக்கும் அளவுக்கு, மாறுவதும் இல்லாமல், கூடவே அமெரிக்க ஃபுட்பாலில், இணையற்ற Blind Side ப்ளேயராக மாறுவது உபகதை.

தெருவில் சுற்றிக் கொண்டிருந்த, Michael Oher -ன் இன்றைய வருமானம் ஆண்டுக்கு பதினான்கு மில்லியன். அதைவிட முக்கியம், இந்த 23 வயது இளைஞனுக்கு, 17 வயதில் கிடைத்த அன்பான குடும்பம். பதினேழு வயதில் 300 பவுண்ட் எடையில் ஒரு பையனை, அதுவும் ஏழ்மையான கருப்பின சிறுவனை, ஒரு பணக்கார வெள்ளையின குடும்பம், தன் சுற்றத்தைப் பற்றிக் கவலைப் படாமல் தத்தெடுத்து, அவனுக்கு கொடுத்த மறு வாழ்க்கை, மைக்கெலை மட்டுமல்லாமல், இன்று எத்தனையோ பேரின் வாழ்க்கையை மாற்றிவிட்டது.

மைக்கெலின் ‘கோச்’ ஆரம்பித்து, அவரது டீச்சர், படித்த பள்ளி, கல்லூரி என அத்தனையும் இன்று பிரபலம். இது வரை வந்த புட்பால் பற்றியப் படங்களை எல்லாம் ஓரம் கட்டிவிட்டு, இந்தப் படம் சம்பாதித்திருப்பது $240 மில்லியன்.

---

சாண்ட்ராவுக்கு 45 வயசு-ன்னு யாராவது ப்ரூஃவ் பண்ணிட்டீங்கன்னா, செல்வராகவன் படமெடுக்கறதை நிறுத்திடுவாராம். ஒரு பக்கம் All About Steve, The Proposal -ன்னு கொட்டம் அடிச்சிகிட்டு இருந்தா...

..இன்னொரு பக்கம், இந்த வருட கோல்டன் க்லோபை தட்டிக் கொண்டு போன பர்ஃபார்மென்ஸ். நம்ம ஹீரோயின்களுக்கு 17 வயசு பையனுக்கு அம்மாவா நடிக்கும் தைரியம் வருமா?? தைரியம் வந்தாலும் நடிப்பு வருமா?? (The Proposal படத்திற்கும் சாண்ட்ராவுக்கு இன்னொரு நாமினேஷன் கிடைச்சது. ஆனா மெரில் ஸ்ட்ரிப் விடுவாங்களா?!!! ரெக்கார்ட் நம்பரில் இன்னொன்னு ஆட் ஆகிடுச்சி).

க்யுண்டன் ஆரன் (Quinton Aaron) நிஜ மைக்கெலை விட, ஐந்து இன்ச் உயரம், இரண்டு வயது அதிகம். 23 கிலோ எடை அதிகம். படத்துக்காக எடையை குறைத்தாராம். சாண்ட்ராவுக்கு அப்புறம், நம் கண் முழுக்க ‘நிறைந்திருப்பவர்’.

இவங்க ரெண்டு பேருமே மொத்த ஸ்க்ரீனையும் எடுத்துக் கொண்டாலும்..., படத்த்தில் வரும்.. அப்பா/குழந்தைகள் கேரக்டர்களும்.., மொழி, நிறத்தை எல்லாம் தாண்டி உங்களையும் அந்த குடும்பத்திற்குள் இழுத்துக் கொள்ளும்.

I Bet!

---

The Blind Side = The Bright Side

---

---